Euskonews Gaztea
Gaiak: Xisko, Zarautzen
Izena: Xisko Gazte Elkartea Egoitza: Urdanetan 6, behea Herria: Zarautz P.K. 20800 Lurraldea: Gipuzkoa Posta elektronikoa: xisko@xisko.tk Telefono zenbakia: 626 60 11 81 Web orria: www.xisko.tk Gure helburua
Gure elkartea katekesia eta sendotzako urteen artean zegoen kristau heziketa hutsunea betetzeko hasi zen lanean; katekistak jardun ziren garai haietan begirale lanetan. Gaur egun, begirale gazteoz osatutako talde bat gara; eta kristau heziketa alde batera utzi gabe urteotan lanean diharduen talde batean bihurtu da. 12 eta 16 urte bitarteko gazteekin egiten dugu lan. Hauekin, bizikidetza eta hezkidetza bezalako baloreak lantzen ditugu. Gainera, gazteek aisialdiaz duten ikuspegia aldatu nahi dugu; gaur egun kontsumismoan oinarritutako aisialdi batean murgilduta bizi baitira. Zer nolako jarduerak antolatzen ditugu?
Hilabetean pare bat larunbatetan biltzen gara gaztetxoekin eta arratsaldea elkarrekin pasatzen dugu era ezberdinetako ekintzak egiten. Gazteenekin jolas mugitu asko egiten ditugu, betiere ekonomikoki gastu gehiegirik eskatzen ez duten material edo ideiekin. Zaharragoekin aldiz, elkar hobeto ezagutzeko eta harremanekin loturiko jolasak egiten ditugu; batzuetan mahai inguru batean eserita, edo horrelako ekintzak egiteko egoki den ingurune batean.
Bestalde, urtean bitan (Gabonetan eta Aste Santuan) aterpetxe bat alokatu ohi dugu. Bertan begiraleok arduratzen gara sukaldeko kontuez eta dinamikak prestatzeaz; gaztetxoek ere beraien ardurak izaten dituzte, mahaia jarri edota etxea garbitzea adibidez. Etxeko lanak denon artean burutuz, elkarbizitzan garrantzitsuak diren hainbat balore lantzen dira. Gainera, egonaldi hauetan ekintza mordo bat egiten da. Gaztetxoek gustuko izaten dute egonaldi hauetara etortzea.