Euskonews Gaztea
Gaiak: Txerrikume konfitatua berakatzen pureaz
Dastatze–menuko plater hau prestatzen ikasiko dugu oraingo honetan Gasteizko Gamarra Ostalaritza Eskolaren eskutik. Argazkia: Gamarra Ostalaritza Eskola. Osagaiak
(15 anoetarako) 5kg baino gutxiagoko txerrikume bat Ahate koipea edo txerri–gantza: txerrikumea guztiz estaltzeko bezain beste Zuritu gabeko 2 berakatz buru Erromero adaxka batzuk Piperbeltz ale batzuk Esnegain apur bat 7 laranja 4 koilarakada azukre Oliba–olio birjin edalontzi bat Tipulin sorta batNola egin
Txerrikumea: osorik lapiko batean sartu berakatz buru osoekin, piperbeltzaz eta erromero adaxka pare batekin. Ahate–koipeaz estali. Su motelean 4–5 ordu inguru eduki irakin ez dezan. Egina dagoela ikustean, koipetik atera eta silpat baten gainean jarri. Berakatz konfitatuak gorde. Hotz dagoenean guztiz hezurgabetzen dugu azala ez dela apurtu behar kontuan izanik. Zabaldu silpat bat daukan plaka baten gainean buruz behera. Gainean beste silpat bat ipini eta honen gainean neurri berdineko beste plaka bat. Azken honen gainean pisua jarri eta hurrengo egunera arte hozkailuan gorde. Pisua eta silpata kendu eta txerrikumea laukizuzenetan moztu. Anoa bakoitzeko bi jarriko ditugu.
Silpat: silikonazko mantela.
Berakatz–purea: txerrikumearekin konfitatutako berakatzak zuritu eta thermomixean erromero apur batekin xehatu. Behar izatekotan, esnegain zorrotada bat gehituko diogu. Gatzez zuzendu.
Laranja–saltsa: Lau laranja zurigailu batekin zuritzen ditugu, azala parte zuririk gabe lortzeko. Azala juliana erara moztu eta galdarraztatu. Freskatu eta ondo lehortu. Zuritutako laranjekin zukua egiten dugu. Zartagin batean azukrea ur pixka batekin jartzen dugu gozoki argi bat egiteko. Prest dagoenean, laranja–zukua eransten diogu. Irakiten utzi eta galdarraztatutako azalak gehitu. Saltsa luzatu behar izatekotan, demi–glace apur batekin egingo genuke.
Laranja–atalak: beste hiru laranjei azala bere alde zuri osoarekin kentzen diegu. Gero, atalak banatzen ditugu beraien arteko geruzak baztertuz.
Tipulin–olioa: tipulina galdarraztatu, freskatu eta paper xurgatzaileaz lehortu. Oliotan sartu eta epeltzen jarri. Gehiegi berotu baino lehen sutatik baztertu, estali eta infusionatzen utzi olioa hoztu arte. Xehatu. Olioa eta tipulina gordinean ere xehatu daitezke.
Infusionatu: likido bat aromatizatu, dela espezia, azal zitriko zein banilla erabiliz, esaerako.
Gainera, beharko dugu: anoa bakoitzeko, erromero adaxka bat edo salbia hostotxo bat.
Bukatu eta aurkeztu: itsasten ez den zartagin batean txerrikume laukizuzenak markatu azala karraskatsu gelditu dadin. Labean berotu. Plater erdian berakatz–pure koilarakada galanta ipini eta gainean txerrikume zatia. Gainetik eta ingurunetik laranja–saltsa bota eta tipulin olioaz, laranja atalez eta salbia edo erromero adaxkekin apaindu. Orain arteko errezetak:
:: Entsaladilla errusiarra eta Txitxarroa bilbotar erara