Euskonews Gaztea
Gaiak: Aurten ere, Senperen!
EUSKONEWS GAZTEAren ERREDAKZIOA
Herri Urrats 2009, maiatzaren 10ean ospatuko da urtero bezala Senpereko –Lapurdi– lakuaren inguruan. Haizea alde baita leloa aukeratu dute Iparraldeko Ikastolen aldeko 26. festa honetarako. Milaka lagunen parte hartzea espero da eta beraien presentziarekin, 2009an Bidarte herrian irekiko duten ikastolari laguntzeko dirua bilduko dute. Izan ere, gogoratu behar dugu Herri Urrats azpiegituretan inbertitzeko dirua eskuratzeko modurik sendoena dutela Ipar Euskal Herrian.
Huts egin ezineko hitzordua bilakatu da Herri Urrats milaka euskaltzalerentzat eta Euskal Herrian ospatzen ditugun ikastolen aldeko festetatik aurrenekoa izatea izan liteke arrazoietariko bat; ikastolekiko dagoen konpromisoa ahaztu gabe, noski. Antolatzaileek –Seaskako lagunek– egun polit bat igaro nahi duten guztiei beraiekin batera besta giroan murgiltzeko gonbita luzatzen die. Nola aspertu?
Ekimen anitz prestatu dituzte maiatzaren 10erako, eta Senpereko lakuaren bueltan aspertzeko modurik ez da egongo. Atonduko dituzten zortzi gunetan zehar, makina bat ekintzatan parte hartzeko aukera edukiko dugu, aktibo zein pasiboki. Abaguneek Euskal Herriko zazpi probintzien izena daukate, eta zortzigarrena berriz, Haurren Xokoa izango da.
Guzi horietan adin eta gustu orori zuzendutako jarduerak prestatu dituzte: jateko guneak topatuko ditugu, ikuskizunekin gozatzeko parada izango da –capoeira edota euskal dantza emanaldiak esaterako–; musikak garrantzia handia edukiko du –Neguri Gorriak, Sagarroi, txalaparta eta abar–; haurrek zerekin gozatu edukiko dute –bertsolari gazteak, Diskofesta, tirolina... Denak balio du euskararen eta batez ere, Iparraldeko ikastolen alde egiteko. Gogoa edukitzea eta bertaraino joatea da parte hartzaileok egin behar dugun dena, antolatzaileak arduratuko dira gainerakoaz eta.
Aurten ere Senperera gerturatzen den jendearen belarrietara makina bat aldiz iritsiko den kanta sortu dute. Haizea alde baita loloarekin bat dator abestia eta EUSKONEWS GAZTEAn jartzen dugu entzungai, eguna iritsi bitartean zure barneko gogoa hazten joan dadin. On egin!
Abestia entzuteko, sakatu hemen
Egitaraua ikusteko, sakatu hemen