Ikusken garaia Ikusken garaia * Traducción al espanol del original en euskera Antxon Ezeiza Mexiko aldean, Alejandro Dumasen eleberri ezagunaren bi zatien izenburuan oinarritutako esaera bat erabili ohi da. Ez dakit beste inon halakorik erabiltzen ote den, baina han behintzat zera esaten da: "Ez dira gauza bera HIRU MOSKETARIAK eta HOGEI URTEREN ONDOREN..." EUSKONEWSerako "Euskal Herriko EGUNGO film laburren eta IKUSKEN GARAIKOen arteko alderaketa" ren inguruko zerbait idazteko eskatu didatenean, esaera hori etorri zait gogora... Ez da harritzekoa. Izan ere, herrialde hartatik etorri berria nintzen Ikuska Saila sortu genuenean (eta ez da plural maiestatikoa... asko ginen tartean alfabetikoki : Javier Aguirresarobe, Juanba Berasategi, Daniel Gil, Luis Iriondo, Koldo Izagirre, Bixente Karda, Alberto Mayán in memorian , José Luis Zabala... eta beren laguntza osoa eskaini ziguten Erakundeak CAJA LABORAL POPULAR, ORBEGOZO INSITUTUA, gerora CEGASA... ). Hogei urte baino gehiago igaro dira ordutik... "Ikuska 5"en filmaketa. Kamara atzean Xabier Agirresarobe. Atzerago Koldo Izagirre eta Antxon Ezeiza. Gauzak, jakina, asko aldatu dira, eta eremu guztietan gainera, baina badira lehengo horretan dirautenak ere... Film laburren EGUNGO egoerari dagokionez, lehenik eta behin aitortu behar dut ez dudala gehiegi ezagutzen... Hortaz, zuzenagoa eta praktikoagoa izango da garai hartako egoera deskribatzea, eta gure lanean eta irizpideetan izan zuen eraginaren berri ematea... Beraz, gai honetan interesa daukanak orduko koordenatu objektibo nahiz subjektiboak gaur egungoekin "gurutzatu" ahal izango ditu, "konparaketa" egin ahal izateko. Goazen 77 eta 78. urteetara Ez nintzen Euskal Herrira itzuli zen bakarra izan... beste lagun asko etorri zen erbestetik, kartzelatik, edota beren kontzientzia kultural eta nazionalak ilundu zituen gau frankistatik... Guztiok geneukan (horixe... pluralean, inolako salbuespenik egin gabe...) GEUREAK izango ziren Gizartea, Morala, Kultura, Artea...etabaita Zinematografia SORTZEKO grina... Ez zegoen ez Euskal Erakunderik, ez Estatuturik, ez ETBrik... Ez zegoen Euskal Zinemaren ametsa bakoitzak gura bezala ulertuta egia bihurtzeko gai zen "euskal zinemagilerik"... Teknikoki kapaz ziren gehienek aurreko urteetako "buru argien ihesean" hartu zuten parte... hizkuntza eta errealitate zehatza falta zitzaizkien... Joan ez ziren batzuek bazeuzkaten ahalmen horiek, baina apur bat gehiago ikastea falta zitzaien, zinematografiaren inguruan benetan jardutea... Ez zegoen, inondik inora, Euskal Zinematografia sortzeko azpiegitura industrial, tekniko nahiz ekonomikorik, Euskal Zinematografia bakoitzak nahi bezala ulertuta... Joseba Elosegi Gernikako bonbardaketari buruzko "Ikuskan". Koordenatu hauek guztiek IKUSKA sortzeko erabakia hartzera eraman gintuzten, hau da, "gaurkotasuneko gaiei buruzko erreportaietara". Eta, horrela, zera erabaki genuen: SERIE bat izan zedila (20 egin ziren guztira), ikasteko orduan JARRAITASUNA izateko, egileen aldetik ANIZTASUNA egon zedila ("gazteak" eta "zaharrak"; hots, hemen bizi zirenak eta "buru argien ihesekoak"), eta planteamenduen aldetik PLURALTASUNA. EUSKARAZ filmatzea Beste ezeren gainetik, Euskal Zinematografia Nazionalerako oinarriak finkatzea... HOGEI URTE IGARO DIREN HONETAN, garai ona da hartutako erabakiei eta koordenatuak interpretatu genituen moduari buruzko kritikak egiteko... Nolanahi ere, bata zein bestea erabilgarriak izango dira GAUR EGUNGO interesatuek egungo egoera aztertzeko eta "IKUSKEN GARAIKO" arekin alderatzeko. Antxon Ezeiza, zine zuzendaria Argazkiak: José María Unsainen "El cine y los vascos" liburutik (Eusko Ikaskuntza, cuadernos de sección cinematografía) Euskonews & Media 92.zbk (2000 / 9 / 22 29) gratuita | Abonnement gratuit | Free subscription Eusko Ikaskuntzaren Web Orria webmaster@euskonews.com http://ikaskuntza.org/cgiBanner/banner.cgi?datos=denda&link=www.gara.net http://ikaskuntza.org/
Webgune honek cookieak erabiltzen ditu, propioak zein hirugarrenenak. Hautatu nabigatzeko nahiago duzun cookie aukera. Guztiz desaktibatzea ere hauta dezakezu. Cookie batzuk blokeatu nahi badituzu, egin klik "konfigurazioa" aukeran. "Onartzen dut" botoia sakatuz gero, aipatutako cookieak eta gure cookie politika onartzen duzula adierazten ari zara. Sakatu Irakurri gehiago lotura informazio gehiago lortzeko.
