Euskonews Gaztea
Gaiak: Hotzari aurre egiteko platera
EUSKONEWS GAZTEAren ERREDAKZIOA
Errezeta: Gasteizko Gamarra Ostalaritza Eskola
Amonak beti esaten zidan goserik pasatzen ez duena, pertsona zoriontsua dela. Ziur uste horrek bultzatuta antolatzen zituen bazkari guztietan mahaia jakiz gainezka egoten zela.
Udazkenean buru–belarri sartuta gaude dagoeneko; aurreneko hotzak ere igaro ditugu, nahiz eta negu–neguko eguraldirik egin ez duen. Uda sasoian ez bezala, janari beroak hartuko du orain nire dietaren zati handi bat. Porru–patatak, dilistak, zopak... Barrutik berotzeko balio zaizkigu lurruna darien platerek eskaintzen dizkiguten elikagaiak.
Baina maiz ez dut jakiten zer edo nola prestatu janaria, eta horregatik, 2010ko uztailean Gasteizko Gamarra Eskolako lagunek emandako errezeta liburura jo dut, eta asteburuko menua prestatzeari ekin diot. Zeuei ere akaso, lagungarria izango zaizue : Argazkia: jenny downing Arrain zopa
Osagaiak (4 anoatarako)
300 g tipula 300 g azenario 5 porru 2 tomate heldu 80 g arroz 1,5 l fumet 200 g itsaski azal Brandya
Nola egin
Bizigai askoko fumeta prestatu. Tipula julianan eta beste barazkiak ilargi erdian moztu eta xamurtu hurrenez hurren, eta bigundutakoan laurdenetan moztutako tomatea gehitu. Ondoren, itsaski azalak gaineratu, berotasuna hartzen utziz garreztatzeko. Arrozarekin lotzen da (40–50 g fumet litroko). Azkenik, fumeta bits gabetu, eta iragaziarekin busti (kasu honetan, 1,5 litrorekin). Gutxienez 20–30 minutu utzi behar da zopa irakiten eta ondoren, xehatu, iragazi, ondu, eta altxatu egin behar da beharrezkoa bada egokitzeko.
Hornidurarako, otarrainska edo ganba zatituak, arrainak dadotxotan eta muxilak (lurrunetan irekiak) erabiliko ditugu.
Prestakin honek amerikar zopa dauka izena eta itsaskiez edota arrainez egiten diren hainbat prestakinentzat saltsa bezala erabiltzen da eta baita hamaika prestakinentzat ere.