Euskonews Gaztea
Gaiak: Zuhaitz Gurrutxaga futbolariarekin hizketan
ARRIETA, Mikel ARRIOLA, Beñat IBARLUZEA, Julen LARIZ, Joseba
Elgoibar Ikastola (DBH 3. maila)
Zuhaitz Gurrutxaga 1980ko azaroaren 23an jaio zen. Elgoibarren bizi zen san Migel auzoan. Elgoibarko ikastolan egin zituen ikasketak batxilergo arte. Elgoibarko taldean hasi zen jokatzen. Urte batzuetara Errealera eraman zuten eta lehenengo mailara iritsi zen. Orain 2.b mailan jokatzen du Zamora taldean eta hirugarren postuan zeuden elkarrizketa unean. Zuhaitz Gurrutxaga.
Ze taldetan jokatu duzu futbol munduan?
Elgoibarren txikitan; Errealeko gazteetan, Sansen eta lehenengo taldean; Algeciras, Rayo Vallecano, Real Union, Lemoa eta orain, Zamoran.
Ze helburu dituzu aurtengo denboraldirako?
Helburua Zamora taldearekin bigarren a mailara igotzea da ahal den partidu gehienak jokatuz.
Zenbat urterekin joan zinen Errealera?
Hamasei urterekin Errealeko gazte taldera iritsi nintzen, ondoren lehen taldearekin 19 urterekin egin nuen debuta.
Zein zen zure txikitako idoloa?
Arkonada zen nire idoloa, Errealeko atezaina.
Nola sentitzen zara lagunak eta familia urrun izanda?
Badaude faltan botatzen dituzun momentuak, baina orokorrean ez dut arazorik etxetik urrun bizitzeko. Noizean behin gainera egiten dut etxera bisitatxoren bat.
Mendia ala Hondartza?
Mendia.
Ze ikasketa dituzu?
Batxilergoa bukatu ostean Soinketako Goi Mailako ziklo bat egin nuen.
Sartzen al duzu golik?
Egia esan, oso gutxi, aurten bakarra daramat oraingoz.
Raul selekziora joan beharko litzatekeela uste al duzu?
Bai. Izan ere, aurreko urtetan ez bezala, aurten merituak egiten ari da selekziora joateko.
Zer iruditzen zaizu Zubiaurre kasua?
Pena bat da jokalari gazte bat urte eta erdian jokatu ezinik egotea horrelako arrazoi batengatik.
Zamora edo San Migel?
San Migel, noski.
Zer egingo zenuke Eibarrek horrenbeste penalti ez hutsegiteko?
Ipuruako porteriak handitu, akaso.
Ze musika mota duzu gustuko?
Aspaldian reggae asko entzuten dut.
Zure kolore gustukoena?
Laranja.
Zeini emango zenioke eskua?
Lurretik jaiki ezin den horri.
Egunkaria zabaltzen duzunean, zer sail zabaltzen duzu lehenengo?
Iritzi artikuluen saila.
Ze zenbaki daramazu Zamorako kamisetan?
3 zenbakia.
Basoa beteta edo erdi hutsik?
Erdi beteta ikusten saiatzen naiz beti.