Artisautza
Carmelo Boneta Lopetegui. Altzari etnografikoen erreprodukzioa: Produktuak
GARMENDIA IARTZA, Koro
Zurezko elementu etnografikoak erreproduzitzen ditu: argizaiolak, atabakak, ezkutuak, atrilak, gatzontziak, kutxak, idazmahaiak, karrakak, konpletak, matrakak, kriskitinak, “tremis”-ak (txokolatea mozteko), gapirioak, etab. Bere tailer-dendan saltzen ditu hauek guztiak.
Horrez gain, enkargu bidez erreprodukzio eta zaharberritze lanak ere egiten ditu.
Xehetasun osoz kopiatzen ditu piezak, baina, gainera, jatorrizko piezaren egur berbera erabiltzen du kopia egiteko. Zahar itxura emateko, kare bizian sartzen ditu lehendabizi eta urtean ondoren; horrela, kalitate handiko patina iluna lortzen du.
1968an hartu zuen parte lehen aldiz artisautza azoka batean, Iruñeko gotorlekuan antolaturiko “Merindadeen Astea” delakoan, eta, geroztik, azoka ugaritan izan da. Gaur egun gutxiagotara joaten da, dagoeneko ezaguna denez, bezeroak zuzenean joaten direlako bere tailerrera, produktuak enkargatzera.
Beste artisau batzuen piezak ere saltzen ditu, batez ere toska apaindua, baina baita kobrea, harria, etab.
Lizarrako buztinezko piezen bilduma eder bat du. Denda. Carmelok zaharberritutako piezen artean, bi azpimarratu behar ditugu: San Pedro parrokiarako erlikia-ontzi bat, zeinari zurezko euskarri berri bat jarri baitzion, boli zatiez estalita, eta San Andreseko erlikia-ontzia, aipaturiko santuaren omoplatoa gordetzen zuen ontzia, 1979an lapurtu zutena. Bada, antzinako argazkietan oinarrituz, Carmelok erlikia-ontziaren egurrezko erreprodukzioa egin zuen, eta ondoren zilar bozelduz estali. Barruan ipintzeko, santu horren beraren beste erlikia bat ekarri zuten Erromatik. 2002an amaitu zuen lana, eta prozesio ikusgarrian eraman zuten tailerretik elizara.