Jose Maria Iparragirre (1820 1881) Iparragirre Bitoriano Gandiaga IPARRAGIRRE Euskal Herriko zeruan miru gorria hegari fiuka eta nabari; hala, zu, Iparragirre, herriaren bistan argi, gitarra ta bular jaiki, euskal foruen koplari. Herritarren sentimendu jatorraren antepara errai, arima ta bihotz, aiko, zu, Iparragirre, hiriz, auzoz, lurrikara; bertso berri ta balada, herri oso baten ahots. Erritmoz eta musikaz euskaldunak iratzartzen lehiatsu zara azaltzen, lamada Iparragirre, profeten taiu zangarrez, entzuleen pozkida zinez eutsi ezina eginez. Erromantiko larria, idealista garbia, askatasuna kantagai hor zabiltza, Iparragirre, lege zaharra goraipatuz, jendea elektrizatuz, azokaz, plazetan, nonahi. Gernikako arbolaren kantuaz duzu zoratzen euskal jendea han hemen. Zu, bai, zu, Iparragirre; eta Euskal Herri izen bera duzu erabiltzen euskal lur denentzat ozen. Euskal Herriaganako maitasunez gainezkako bozeramaile azarri gora, zu, Iparragirre, herri irredento honen adore eta gozamen nahitaez baitzara, sarri. II IPARRAGIRRE Ekaitza sumatu duzu gogor etortzen herrira arbola maluskatzera, eta zu, Iparragirre, gitarra lagun hartuta plazara zara atera etsaia konjuratzera. Zure bertsoak zu dira, suzko bertso su emaile, zure boza beroa da. Galda zu, Iparragirre, foruzale den herrian kantatzen duzun auzia foruen arazoa da. Herriaren ikurra den arbolaren abeslari setatsu eta suharra horra, zu, Iparragirre, gehiengoaren gogoko askatasunaren oihu ezin eutsizko giharra. Auzoz, herriz, hiribilduz hor ari zara kantuan jendaldearen aurrean zut asko, Iparragirre, euskaldunak erkidetuz Euskal Herri berean ta barne mugarik gabean. Sugar izateko sortu zinen ta sua pizteko, airearen adiskide, goitar zu, Iparragirre, sorterriarenganako maitasunaren beteko kantu eta hitzen labe. Zure lurretik joranen haizeak urrundutako amets gizon itzelezko, bazoaz, Iparragirre, noizbait berriz itzultzeko, miru beti herrimindu errenditu ezinezko. Bitoriano Gandiaga
Webgune honek cookieak erabiltzen ditu, propioak zein hirugarrenenak. Hautatu nabigatzeko nahiago duzun cookie aukera. Guztiz desaktibatzea ere hauta dezakezu. Cookie batzuk blokeatu nahi badituzu, egin klik "konfigurazioa" aukeran. "Onartzen dut" botoia sakatuz gero, aipatutako cookieak eta gure cookie politika onartzen duzula adierazten ari zara. Sakatu Irakurri gehiago lotura informazio gehiago lortzeko.
