Gaiak
Mintzalagunak: Euskosareko euskal hiztunen komunitatea
Gizartean ematen den komunikazioa geroz eta elektronikoagoa dela ez da berritasun bat, komunikazioa hau geroz eta globalagoa dela ezta ere. Internetak, gurea bezalako hizkuntza txikiei paregabeko aukera eman die XXI. mendean aurrera egiteko, tresna teknologiko berriek eskaintzen dituzten komunikazio modu berriak erabiltzeko gai bagara. Euskal espazio sozial elektroniko baten sorrera aurrera doa azken urte hauetan eta gure hizkuntzaren presentzia areagotzen doa egunetik egunera, Intenetean, sarean, “Euskal ziber mundua” eraikitzen ari garelarik denon artean.
Euskosare proiektuaren izpirituari jarraituaz, hau da, euskal komunitate globalari zerbitzu eta erreferentzi puntu bat eskaini nahiaz, orain hilabete batzuk Mintzalagunak komunitatea sortzeko aukera izan genuen.
Hasiera batean, Mintzabidea euskara ikasten ari direnen gunea eta Mintzalagunak euskara “menderatzen” dutenen komunitatea izateko asmoarekin sortu bazen ere, ideia euskararen erabilera hutsa baina pixka bat haratago joatea izango litzateke: Mintzalaguna munduan zehar dauden euskaldunen elkargune bat izan nahi luke. Komunitate aktibo bat euskara erabili nahi dutenentzat, euskara sustatu, euskaraz eztabaidatu edo munduko euskal hiztunen artean sortu daitezken edozein gaietaz eztabaidatzeko gunea: mundu osoko euskaldunen arteko ideien truke gunea.
Horrelako komunitate zabala sortzen denean, ez da jakiten inoiz noraino helduko den edo zertan bilakatuko den, eta horixe da azken batean komunitatearen indarra: berak erabakiko du bere izatearen beharra zerbitzu bezala balioa duen arabera.
Oraintxe berrogeitasei Mintzalagunek parte hartzen dugu komunitate honetan. Gaiak denetarikoak izan dira azken hilabete hauetan: euskalkien idatzizko erabilketatik, Euskosaren euskararen erabileraz izan dugun eztabaida aberatsa, munduko euskaldun lagunen arteko harremanak, informazio eskaerak etab. Komunitatea bizirik dago eta aurrera doa. Hurrengo pausoak Blog bat sortzea, Skype edo msn erabiliaz bilerak antolatzea, Euskararen Nazioarteko Egunaren inguruan mobilizatzea... ideiak diren artean komunitateak aurrera egingo du! Hau irakurtzen ari zaren hori! Gure komunitatean parte hartu nahi baduzu jo oraintxe bertan www.euskosare.org eta bertako komunitateetan Mintzalagunak komunitatean eman zure izena. Zure ekarpena benetan garrantzitsua da!