PROZESUA

Nagusiki urrea eta zilarra landuz, elementu guztiz originalak egiten ditu. Horretarako, bitxitegietan erabiltzen diren teknika eta lanabesak erabiltzen ditu: mahaia, sopletea, mikromotorra, hainbat ahotako aliketak, guraizeak, moztu eta zulatzeko segueta, hainbat pintza, tasa, mailuak, ultrasonikoen ekipoa, limak, lixak, barailak, burilak, eskuairak, konpasak, arkatzak, pintzelak, etab. Hori guztia, jendeari irekita daukan tailer-denda txikitxoan. Baina bizi den baserrian tailer handiago eta osoago bat du, non beste tresna hauek baitauzkan:

• Metala urtzeko ekipoa, eta galdategietan erabiltzen diren gainerako tresnak.
• Metala xafletan edota harietan prozesatzeko laminatzaileak.
• Trefilagailuak, kurrikak, enbutidorea, etab.
• Piezak leuntzeko leungailua. Prozesuko zatirik zikinena izaten da hau.
• Leuntze lana arintzen duen bonboa.
• Leundu ondoren piezak garbitzeko ultrasonikoen makina.
• Harea makina, zeinak, harea zorrotada bat botaz, piezei kolore "mateak" ematen dizkien, akabera ezberdina izan dezaten.
• Esmaltatzeko labea, bere osagarri eta tresneriarekin, piezei "su bidezko esmaltea" emateko.
• Beste hainbat elementu.