Lan honetan Euskal Autonomi Erkidegoko ekonomian manufaktura industriako enpleguak beste herrialdeekin alderatuz duen garrantzia eta enplegu hau sektore eta tamaina desberdineko enpresetan 1985 eta 1997eko aldian nola banatzen den ikusi ondoren lortu ditugun zenbait ondorio aipagarri laburbilduko ditugu.

• Euskal Autonomi Erkidegoan manufakturako industriako enpleguak ekonomian duen pisua beste herrialde garatuetan baino (Europa-15en, EEBBetan eta Japonian) altuagoa da.
• EAEko industriako enpleguan metalen eraldakuntzako sektoreetan dago enplegu gehien (industriako enpleguaren %58)
• Enpleguak sektoreka izan duen bilakaera aztertzen bada, Altzairungintzako sektoreko enpleguak 1997an 1985ean zuen pisuaren erdia du, sektore honetan azken hamarkadan lanpostu asko galdu baitira.
• Azken hamarkadan pisua irabazi duten sektoreak Material Elektrikoak, Garraio Materiala eta Egurra eta altzariak izan dira.
• Manufakturako enpresen %86ak 20 langile baino gutxiago ditu EAEn eta %97ak 100 langile baino gutxiago. Beraz, enpresa txikiek pisu handia dute gure ekonomian.
• Manufakturako enpleguaren %50a 100 langile baino gutxiagoko enpresetan dago, %33a 100 eta 499 langile bitartekoetan eta %17a 500 edo langile gehiagokoetan.
• EAEko manufakturako enpresa batek batez bestean 16 langile ditu.
• EAEko manufakturako industrian enpresa txikietan dagoen enpleguaren pisua %36tik %50era igo da 1985 eta 1997 bitartean. Enpresa txikietan dagoen enpleguaren pisua igotze hau sortzen diren enpresa txikiak isten direnak baino gehiago izateagatik gertatzen da. Fenomeno hau ez da EAEn bakarrik ematen, baizik eta beste herrialde aurreratuetan ere aurkitu dezakegu, eta badirudi aldaketa honen atzean bai globalizazioari eta bai teknologiaren aldaketei loturiko arrazoiak daudela.
• 1997an 1985ean baino %15 lanpostu gutxiago daude EAEko industrian. Enplegu gehien galtzen duten sektoreak Altzairugintza, Kautxua eta pneumatikoak, eta Ontzigintza dira. Enplegu gehien irabazten dutenak berriz Metalezko eraikuntza eta Automobila eta piezak. Enpresen tamainaren arabera enpleguak izan duen bilakaera aztertuz, 20 langile baino gutxiagoko sektoreetan ia urteoro enpleguak gora egiten duen bitartean, enpresa ertain eta handietako enpleguak ia urteoro behera egiten du.