Udako Euskal Unibertsitateak (UEUk) burutu ditu jadanik 26. Udako ikastaroak. Uztailaren 6tik 11ra bitartean Miarritzen eta hilaren 20tik 31ra Iruñean egin dira saioak.
Urteak joan urteak etorri, epe berri baten atarira eraman gaituzte aurtengo jardunaldiek, oreka eta heldutasuna ezaugarri dituen epealdira, alegia.
Orotara 32 ikastaro izan ditugu, ikastaroon edukiari eta kalitateari bagagozkio, zalantza barik, heldutasuna azpimarratu beharko genuke. Uztailean zehar Miarritzen eta Iruñean aztertu gaien eta urte osoan egitaraua prestatzen aritu den taldearen kalitateaz ari gara. Zaila zaigu oso aukera oparo honetan zerbait nabarmentzea, ezberdintasunak gaindituta, saio guztiak baitira, gure irudiko, azpimarratzeko modukoak. Hor dituzue, adibidez, Natur Zientzietako saio teoriko eta praktikoak, hots, Euskal Herriko Basogintza eta Nekazaritza aztertzeko burutu hitzaldi eta irteera ezberdinak. Hor dira UEUko sailen artean burutu disziplinartekoak: internetek duen alde beltza aztertzeko elkartu dira Soziologia eta Zientzia Politikoko sailak Informatikako sailekoekin, futbolaz eta, orohar, masa kirolaz aritzeko Antropologia eta Historia Sailak.... eta abar.

Bestalde, kontutan izatekoa da ere ikastaroetan nagusi izan ohi diren hitzaldi magistralak aberasteko egin den ahalegina; horrela, aztertzen diren gaien alde guztiak agertzearren, saio praktiko ugari izan da aurton, besteak beste: haize energiaren ezagupenetan sakontzeko Erreniagako Parke eolikora bisita egin zuten Kimikariek, Itoizko urtegiaren auzian sakontzeko asmotan Itoitzera abiatu ziren Zuzenbide sailekoak, Euskal Gauaren azterketa astronomikoa burutu zuten Fisikariek, Iratiko bailarako pagadi eta hariztieta ibili Natur Zientzietakoak... zerrenda luzeegia.

Aipatu heldutasunera ere merezimendu osoz iritsi dira Iparraldeko ikastaroak. Azken urteotan gorako joera nabarmena sumatu dugu bertan; gora egin du partaideen kopuruak eta, apika garrantzitsuagoa dena, saioen kalitatea ere hobeagotu da. Aurtengo ikastaroak bide beretsutik joan direla esatera ausartuko ginateke: ikasle nahiz irakasleentzat erakargarria izan den egitarauari gainbegiratu bat emanez ohar zaitezke horretaz. Gainera, aurton berritasuna izan den egoitza aldaketak on egin die ikastaroei. Orain arteko Baionako ikastaroak lekuz aldatu dira eta Miarritzen burutu dira oraingo honetan, hiri eder honetako Ostalaritza Lizeoak eskaintzen dituen baliabideak ikastaroen beharretara bikain egokitu direla.

Udako ikastaroek izaten duten alde ludikoa ere azpimarragarria da. Aurtongo edizioan Asier Serrano, Bernardo Atxaga, Josune Ariztondo eta beste hainbesteen solasaldia izan dugu. Xabier Amurizak berak bere azken lana den Bizkaiko Koplen Bilduma aurkeztu egin du. Gauak ere antzerki, musika eta ekitaldi ezberdinez ederki giroturik joan zaizkigu.

Heldutasunaz luze hitz egin dugu jadanik. Gatozen orain, beraz, orekara.

Oreka erdiestea ez da, egia esan, oso samurra izan UEUrentzat. Orain baino lehen ere, gure erakundearen egoera ekonomikoaz kezkaturik, horrek epe motz eta ertainerako proiektuak garatzeko ezintasuna sortzen duela aitortu dugu. Egoera kezkagarria izanik ere, garapen- eta hazkunde-joerari eusteko gaitasuna izan dugu. Izan ere, gero eta handiagoa da UEUren onarpen soziala ; partaidetza marka guztiak hautsi egin ditugu, ikastaroen kalitateaz ez du inork dudarik egiten eta duela urte batzuk aurreikustezina zen tokirantz ari gara apurka-apurka hurbiltzen, gizartearen onarpen osorantz, alegia. Txanponaren bi aldeak, beraz: irauteko baliabide nahikorik eza eta irauteko nahi eta beharra.

Oreka eta heldutasuna. Horiexek dira aipatu ekitaldien ezaugarri nagusiak. Datorren urteko 27. Udako Ikastaroen prestaketetan murgilduta gaude jadanik. UEUren hurrengo hilabeteotako lana izango dira, ez, ordea, lan bakarra, urtez-urte ekitaldi ezberdinez josten baitu UEUk ikasturtea.

Mikel Aizpuru
UEUren zuzendaria