Loramendi.Gipuzkoako olerkaria (Bedoña, Arrasate, 1907-Donostia, 1933). Hamairu urte zituela Altsasuko kaputxinoetan sartu zen. Teologia ikasten ari zela, gaixotu eta 26 urte ozta-ozta beterik zituela hil zen. Zeruko Argia eta Yakintza aldizkarietan argitaratu zituen bere idatziak. Gerra aurreko Olerkarien belaunaldikoa izan zen, Lizardirekin, Lauaxetarekin eta Orixerekin batera. Loramendiren olerkigintza lirikoa da, eta, sarri, Jainkoa du kantagai. Tolosan (1931) eta Hernanin (1932) Euskaltzaleak erakundeak, Aitzolen agindura, eratutako Olerki Jaietan bi sari jaso zituen Arrantzalien arrats-otoitza eta Barruntza leyotik izeneko olerkiekin. Julen Yurrek, 1960an, Aranaren idazlan guztiak bildu eta argitaratu zituen Loramendi. Olerki ta idatzi guziak izen-burupean.

Nafarroa Beheko idazlea (Buzunaritze-Sarrasketa, 1869- Ezpeleta, 1930). Larresoro eta Baionako apaizgaitegietan ikasketak egin ondoren egin zen apaiz, 1869.urtean. Euskaltzaleen Biltzarra elkartea sortu zuen beste batzuekin batera eta aipatu elkarteko idazkaria izan zen. Joannateguy beneditarrak Fedearen Hedameneko Urtecaria (Les annales de la propagation de la Foi boletinaren itzulpena) utzi zuenean Landerretcheri eskatu zitzaion lanarekin aurrera egin zezan 1891. urtean. Aphurka zahar eta berri ahurtara bat eskuararen alde eskuizkribua argitaratu zuen 1905ean. Euskaltzaindia osatu zenean (1919) Lapurdiko ordezkaria izan zen.